Mathura District Metro (BrajMandal)-
भविष्य में मथुरा में मेट्रो आबैगी तौ salutation और information की लिया-देइ या तरीका ते करी जाय करैगी ।
कोक़िलावन (कोसीकलां) ते बनकें चलबे वारी मेट्रो गोवर्धन/वृंदावन हैकैं मथुरा में घुसैगी और सूधी गोकुल हैमत भये दाऊजी कूँ निकर जाएगी । इन शहरन कूँ जाबे बारे यात्री आइकैं बैठ जाऔ । कोकिलावन के बाद पहलौ मैट्रो स्टेशन *नंदगाँव* पड़ैगौ , बरसाने बारे आदमी अगले स्टेशन की प्रतीक्षा करें । यात्रीगणन कृपया करकें आयगे की तरफ मौहड़ौ करकें खड़े है जाँय । अगलौ स्टेशन बरसाने कौ आ चुकौ है बसस्टैंड की ओर उत्तर जाएं । आयगे कौ डिब्बा नारीन के लैं आरक्षित है, लपका और लऊआन कूँ सख्त चेतावनी है कै वे वा डिब्बा में नाँय चढ़ै अन्यथा हाथ-पाँव तोड दिये जांगे । अगलौ स्टेशन *ग्राम पलसों धाम* है, दरवज्जे सती हरदेवी मंदिर की ओर खुलंगे, कृपया आराम ते उतरें । अगलौ स्टेशन गोवर्धन आबे वारौ है । मेट्रो में कोई धूम्रपान नाँय करें तौ अच्छौ रहबैगौ । लेऔ जी गोवर्धन रेलवे स्टेशन आ चुकौ है नीमगांव और गांव भरनाकलां/ सहार के आदमी यहाँ उतर सकतैं । अगलौ स्टेशन दानघाटी गोवर्धन है परिक्रमा बारे यही पै उतर जायँ तौ फायदा में रहंगे ।
जे गाड़ी यहाँ ते सीधे वृन्दावन जाएगी । अगलौ स्टेशन चन्द्रोदय मन्दिर है, छटीकरा और चौमुहाँ के लैं फीडर बस कौ प्रयोग करें । अगलौ स्टेशन प्रेममन्दिर है, दर्शनार्थी दर्शन करबे कूँ यहाँ उतरें । अगलौ स्टेशन बिहारी जी मंदिर, यात्रिगण उतरबे में हड़बड़ी ना करें आराम ते उतरें और निश्चिंत रहें चौं कै आप ब्रजधाम में हौ । अगलौ गायत्री तपोभूमि मथुरा स्टेशन है, आकाशवाणी बारे यहीं उतर सकतैं । गाड़ी की दिशा में जाबे बारौ डिब्बा, लुगाइन के लैं घिरौ भयौ है , या डिब्बा में चढ़बे की कोशिश करबे बारौ, 'दंड कौ भागी' होयगौ । जे भूतेश्वर जंक्शन है जे गाड़ी नए बसड्डे ते हैं कैं जंक्शन की ओर जाएगी, 'कंकाली बारे' और गोवर्धन चैराहे बारे यहीं पै उतर जइयों । चौं कै यहाँ ते बैंगनी रंग की मेट्रो गोवर्धन कूँ कृष्णा नगर हैकैं जायगी ।
अगलौ स्टेशन कृष्णा नगर चौरायौ आबैगौ, वहाँ ते रामलीला मैदान बारे कृष्णा नगर बजार मांऊँ और राधानगर बारे, मोहन मिष्ठान मांऊँ जा सकें ।
सावधान है जाओ दरवज्जे बन्द हैवे वारे हैं अगलौ स्टेशन मथुरा रेलवेजंक्शन है दिल्ली-आगरा जानौ होय तौ यहाँ ते ट्रैन लै कैं निकर लेओ । यहाँ ते टाउनशिप' जाबे बारेन कौ "यात्री किरायौ" आधौ कर दियौ है, म्हां जाबे बारे खूब लाभ उठाऔ ।
अगलौ स्टेशन *मथुरा कचहरी* जा काऊ कूँ केस-वेस सुल्टानौ होय तौ उतर लेओ । अगलौ स्टेशन टाऊनशिप, रिफायनरी वारे यहाँ पै उतरैं, जे गाड़ी गोकुल बैराज ते गोकुल कूँ जायगी चुप्प-सीना हाथ जोड़ कैं जमुना जी की ओर बैठ जाऔ और पइसा तौ अब तुम फेंक ही नाँय सकें चौं कै भिच्ची में आयगे हो चौं कै दरवज्जेन पै शीशा जड़े भये हैं, जे नाँय होंते तौ तुम धकाधक फेंके बिना मानते थोड़े ही। आबे वारौ गोकुल स्टेशन है दरवाजे सूधे हाथ माहुँ खुलंगे । अगलौ स्टेशन महावन है खीरमोहन मिठाई खाबे वारे यहाँ उतरें । अगलौ स्टेशन रमणरेती है ब्रज की रज में लोर मारबे कूँ व हाथीन द्वारा आरती देखबे कूँ यहाँ उतरें । अगलौ स्टेशन दाऊजीनगर है, जे पंडान की नगरी है, मिश्री कौ स्वाद यहाँ चखौ जा सकै है , ब्रजराज दाऊजी के दर्शन कूँ यहाँ उतरें । जे गाड़ी यहीं तक है फिर यहीं ते वापस कोकिलावन कूँ बनकें जायगी ।
